الصورة: عمل بعنوان Welcome Refugees. خطــ٣٠ // تنشر وفق الحقوق المفتوحة Copyleft
الموسيقى: Daniel Birch – Music Box and Chill تحت رخصة المشاع الإبداعي
احتجاجات لاجئين مرحلين على الحدود السورية التركية
علي البكور: في ناس ما بتعرف تقرا عربي ولا تركي
اميين يعني في منهم بصموا وفكروا بدنا نطلع
اي موظف نسأله وحتى في مترجم عربي قال كمان ما بعرف شيء…
رح ترجعوا كل واحد على ولايته
انا مستغرب لما تدخل جوا قرأت موجود بصمة طوعية للرجوع إلى سوريا
فمباشرة سحبنا ايدينا انه نحن ما بنرضى نبصم على هاد الشيئ لان ما بدنا نرجع
أجبرونا إجبار وابصم ويلا وقع
ويلي ما رضي يوقع.. هنن شخبطو عنه.. اللهم انه بصم
وللدولموش (ميكرو باص) مباشرة.. يعني ما بخلوا الواحد يناقش أو يطلع براحته لاء
محمد: أول شهرين بحياتي باسطنبول
قضيتهم بخيمة على شاطئ جزيرة قريبة من المدينة.
وبعدين نقلت خيمتي للبيت يلي استأجرته
وبقيت نام فيها شهر
لاني ما كنت عم اقدر حس بالثبات.
كنت عايش بحالة عابر السبيل يلي ما بده اكتر من سقف خيمة مؤقت
لبين ما يعبر لهدفه
ولليوم كل ما شوف شجرة مزروعة بالأرض
بحسدها على ثباتها و بتذكر اني معلق بالهوا
محمد: انا محمد عرواني صحفي سوري.. ونصف لاجئ..
معلق بشقفة ورقة.. اسمها الحماية المؤقتة.
شغلتها تحمي (الضيوف) السوريين بتركيا بشكل مؤقت
هشام جوناي: بالبداية الحكومة يبدو ما كانت متوقعة انه هذا الموضوع يطول لهالدرجة
هنن هدفهم كان انه الثورة السورية تنجح ويأسسوا نظام
والناس الي اجو يرجعوا الى بلادهم بعد فتره مؤقتة.
محمد: هاد صوت الصحفي والمحلل السياسي التركي هشام جوناي،
وهو بيحكي عربي كتير منيح
هشام جواناي: يعني صار في حاجه لتوصيف قانوني لهدول الناس..
طالت فترة إقامتهم صار في ناس يعني انولدوا بتركيا
صار لهم حاجة التعليم صار لهم حاجة للخدمات الصحية
صاروا في حاجة لشيء يعرف وجودهم بهذا البلد..
فتم ابتكار ما وصف بالحماية المؤقتة
اللي هو اصلا ما بجيب له لا حق ولا شيء للسوريين
فقط هو ان يضمن له حق العلاج وحق الإقامة وبعض الأمور..
محمد: يحق للسوري الحامل “للكمليك” أو لبطاقة الحماية المؤقتة
حرية الحركة في ولاية محددة… وحق الطبابة والرعاية الصحية وحق التعليم.
لكن في المقابل في شروط مشددة تفرضها الحماية المؤقتة والالتزام فيها هو بحد ذاته ازمة
مثلا الحماية المؤقتة مرتبطة بالمكان، أي الولاية اللي انت مسجل فيها.
ويمنع على السوري الحركة بين ولاية وأخرى بدون إذن سفر رسمي…
والإذن بمعظم الحالات بكون الحصول عليه شبه مستحيل.
لهيك ممكن تلاقي عائلات مو قادرة تعيش مع بعضها تحت سقف واحد
لانهم مسجلين بولايات مختلفة..
هشام جوناي: كتوصيف أصلا (حماية مؤقتة).. المؤقت هاد متى ينتهي؟؟
يعني لازم يكون في تحديد لهي الفترة
لما بنحكي انه مؤقت معناته ممكن ينتهي اليوم او بكره او بعد شهر أو بعد عشر سنين
محمد : وفيه مسألة ثانية لا تقل أهمية عن الشروط القاسية التي ذكرناها…
ورقة الحماية مو مثل تصريح العمل أو الإقامة،
يعني مستند له مدة محددة بيتم تجديدها كل فترة.
لاء. مافي قانون واضح ينظم مدة الحماية.
هي ببساطة ممكن تنتهي في أي لحظة.
وهاد سبب مباشر لمشاكل كبيرة تخص حياة السوريين بتركيا.
تنظيم العقود مثلا.
ليضمن المتعاقد انك رح تلتزم بشروط العقد
لازم يتأكد انك رح تبقى مقيم في بلده بشكل شرعي
لفترة انتهاء العقد… وهاد مو مضمون.
(مقتطف من مكالمة)
محمد: هاد صوت زوجتي الصحفية ديما شلار
تنقل لي خبر صرت متعود عليه.
أنا استغنيت عن الخيمة من خمس سنين لكن هاد مو معناه إن حياتي فيها ثبات أكثر…
بالعكس… هي المرة السابعة على الأقل يلي بنجبر فيها دور على بيت جديد… 7 مرات…
7 مرات مجبور اوضب اغراضي و أفرغهم من الصناديق…
بكل مرة بنتقل فيها بضطر استغني عن اغراض لصعوبة نقلها أو تخزينها…
بس أحيانا بلاقي بين هالاغراض ذكريات حلوة
لقيت music box … كان هديتي لديما بعيد ميلادها
المبررات يلي بقولها كتير من اصحاب البيوت لحتى يجبرونا نترك البيت بعد عقد سنة واحدة بس:
انهم بيخافوا نستعصي في بيوتهم أو نخربها أو نهجرها بشكل مفاجئ
بدون ما ندفع مستحقاتنا المالية….
كلام بالنسبة ليا هو خليط من العنصرية المبطنة وبين الخوف من الوضع القانوني الهش للسوريين.
أي… كسوريين في تركيا، العنصرية جزء أساسي من حياتنا اليومية.
لدرجة ان كلمة “سوريالي” – يعني سوري بالتركي – صارت شي بيشبه التهمة.
وكتار يحاولوا يخبوها وما يصرحوا بجنسيتهم الحقيقية.
بالنسبة للصحفي هشام جوناي،
الحكومة التركية مسئولة، ولو بشكل غير مباشر، عن تغذية العنصرية تجاه السوريين.
هشام: مثلا الخطابات دائما اللي بنشوفها من الحكومة…
مثلا الرئيس ليل ونهار نحن صرفنا على السوريين 45 مليار دولار
تمام بس يعني المواطن التركي الفقير اللي عم يسمع هذا الخطاب شو بدو يقول؟!
يعني وين انا حقي من 45 مليار دولار هاي انت عم تصرفوا على السوريين.
طيب هذا الخطاب هل هو لصالح السوري؟ انه احنا ساعدناهم، ام ضده؟
ما عم نعرف لأنه ينقلب ضده
في كتير ناس بتقول لك يعني في ناس معارضين مثل رئيس بلدية بولو
أو في ناس في الجي هي بي أو في ناس بأحزاب اخرى.. حزب الخير أو الايي بارتي بيحكو بشكل عنصري
محمد: رئيس بلدية مدينة بولو… بيقول السوريين والعراقيين متخلفين عن الاتراك 30 سنة
وبيسأل كيف ممكن دمج هيك عالم في المجتمعات التركية
محمد: “إيلاي أكسوي” من حزب الجيد أيي بارتي بتقول:
ان مدينة أورفا تعاني وتشتكي بشدة من مشاكل أخلاقية سببها السوريين
وطبيعة حياتهم التي لا تتناسب لا أخلاقيا ولا ثقافياً مع عادات مدينة اورفا
هشام: يعني وين المدعي العام اللي لازم اصلا يروح يحضر مذكرة
بحق هذا الرجل اللي عنده خطاب عنصري و خطاب كراهية ويحاسبه.
محمد: رئيس بلدية مدينة بولو… سنضيف 10 أضعاف الضريبة على فاتورة الماء…
لن يستخدم المواطنون الأتراك والمواطنون الاجانب الماء بنفس السعر
هشام: اذا انت ما حاسبت شخصيه مثل هذا
فأكيد الناس العادية راح يقولوا ايه عم يحكي الزلمة عم يقول كل شيء.
ومو صاير له شيء ما عم يصير له شيء.
وهذا الشيء كمان عم يخلي الناس تتجرأ أكثر وتتمادى أكثر
(أصوات الاحتجاجات على الحدود بين سوريا وتركيا)
محمد : بشهر كانون الثاني (يناير) من سنة 2022،
رحلت السلطات التركية حوالي 150 لاجئ إلى سوريا بشكل تعسفي..
محمد: هاد صوت احتجاجاتهم…
بعضهم يحمل بطاقة الحماية المؤقتة، وبعضهم طلاب وموظفين باذن عمل قانوني.
علي البكور: انا بالنسبه الي طالب جامعه بدرس في جامعه اسطنبول اسنيورت
محمد: علي البكور هو طالب جامعة سوري وأحد المرحلين.
علي البكور: كنت طالع على الجامعه مشان اقدم امتحان بعد صلاه الظهر
مسكوني وطلبو “الكمليك”.
اعطيتهم البطاقه الجامعيه ما قبلوا البطاقه الجامعيه اعطيتهم الكمليك شافوا انه ولايتي هي أضنة
مباشره قالوا تفضل معنا على الباص
احاطوني من كل الجهات، خافوا ان اهرب.. بس انا مافي علي شيء
استغربت من هالشي يلي صار
طلعت عالباص على اساس انه وقع وانزل .. هيك على حسب ما فهمت منهم
كلشي معي اخذوه.. حتى كان معي اقلام ومحاية كمان اخذوهن وما خلوا شي معي نهائيا
وبدي ناقشهم واحكي معهم ما خلوني
اخذوني على سجن “توزلا” في تاريخ 21 الشهر
اجا محامي ليشوف وضعي .. وما خلوه يدخل اجوا اقاربي يشوفوني وما رضوا يخلوهم يدخلوا
29 الشهر طلعونا من السجن
اخذونا… بصّمونا مباشرة بحدود الساعة 1:30 او 2 بالليل
بصّمونا يعني بالغصب عنا
وبعد ما بصمونا دخلونا على الأراضي السورية
فقلنا بدنا نركض نلحق الدولموش بلكي بنرجع دخل تركيا…
فما خلونا وصار يقولوا ارجعوا على سوريا مافي رجعة لهون
محمد: على فكرة هاي مو أول مرة يتم ترحيل سوريين بهاد الشكل…
رواية علي مطابقة تماما لروايات مرحلين آخرين تواصوا مع وسائل إعلام مستقلة…
علي قال انه مسجل بولاية أضنة وليس إسطنبول،
يعني وفق شروط الحماية المؤقتة لا يحق له يكون باسطنبول بدون إذن سفر
حتى لو كان طالب جامعة في اسطنبول نفسها…
لكن حتى لو كان علي مخالف لشروط الحماية…
وخبراء القانون بيقولوا إن هاد مانو أبدا سبب قانوني للترحيل…
وتنص المادة 55 من قانون الأجانب والحماية الدولية في تركيا
يمنع ترحيل الأجنبي في حال وجود احتمال لتعرض حياته، في البلد الذي سيرحل إليه
وسوريا بالتأكيد هي بلد خطير وغير آمن.
محمد: هاد هو شكل الحياة كلاجئ سوري في تركيا…
ولكن في ظل الوضع المؤقت، في أشياء دائمة وثابتة بحياتنا…
أولا، فيه الخوف الدائم من الترحيل وثانيا، في التنقل الدائم من بيت إلى بيت.
(أصوات مفاوضات مع السمسار باللغة التركية)
بلشنا عملية البحث عن بيت جديد
يعني زيارات ومفاوضات مع السماسرة ومعظمها بدون نتيجة
فـ عم قول لحالي اني ما عقدها واعمل فيها دراما…
المفروض مع الانترنت تكون القصص بسيطة…
وفعلا، فورا لقيت بيت بسعر ومواصفات مناسبة
بس لحظة Yabanciya Uygun Degil هممم غير مخصصة للأجانب
شكلي لازم اضبط حماسي
وهي لقيت بيت تاني
هاذا المنزل مناسب للأجانب بس بشرط دفع عام مقدم + مبلغ تأمين.
إذا بدي ادفع سنة كاملة مقدم ليش التأمين ؟!
في كمان شغلة ثانية.
يمكن انا وزوجتي ديما تعودنا على الترحال الدائم وكنا قبلانين بهاد الواقع.
لغاية اللحظة الي انضم فيها لعيلتنا فرد جديد..
هي غندورة
وهلق غندورة حامل
بصراحة انا خايف الانتقال يؤثر على غندورة بشكل سلبي
لان المعروف ان الأمان بالنسبة للقطط مرتبط بالمكان يلي هي عايشة فيه
أو ببيتها أكثر من ارتباطه بصاحبها أو بالإنسان العايش معها.
خاصة اذا كانت القطة على أبواب ولادة
محمد: احيانا بلوم حالي وبقول اني لو اندمجت اكتر ضمن المجتمع،
وتعلمت اللغة بشكل أفضل،
يمكن كان فيني أقنع أصحاب البيوت اني ما بخوف
وانني بين قوسين انسان متلي متلهم
هشام: يعني اللاجئ اجا لهون .. المفروض بالمفهوم الأوربي للجوء
بتاخذك السلطة يتحطك في بيت وبتدفع لك راتب شهري،
وتبعتك لدورة لغة، أو دورة تأهيل مهني وبعدين بتخليك تدخل بالمجتمع.
هون ما صار هيك
هون مئات الآلاف فتحوا الحدود ودخلوهم
وهالناس اتفرقوا بهالبلد راح كل واحد باتجاه وصار لازم يواجه مصيره بايده
يعني ما كان في سياسة منظمة من الحكومة للتعامل مع هذه الظاهرة
شو بدي احمل اللاجئين الزلمة جاي لبلد ما بيعرف لغتها أو نظامها ما بيعرف شيء عنها
لما انت بتجي ويتحمل اللاجئ المسؤولية انه ليش ما تعلمت
طب هو اذا كان الواحد جوعان،
كيف بدك تطلب منه يتعلم لغه وين هي يتعلم لغة!
بده يروح يشتغل يشوف مكان يؤويه يؤوي نفسه،
يشوف مكان آمن لزوجته وأولاده
في أولويات لازم يعني يشتغل عليها قبل قبل
علي: أهلي موجودين في أضنة … اقاربي كلهم موجودين في اضنة
وانا دخلت لتركيا من أكثر من 8 سنوات
لما دخلت لسوريا استغربت
انا طلعت من سوريا بعمر صغير فما بعرف شو في شو صاير
للحظة إعداد البودكاست ما صدر تصريحات رسمية عن ترحيل علي البكور وبقية اللاجئين يلي معه
بعد ما أجبروهم على توقيع وثائق العودة الطوعية.
ولكن لما صارت أحداث شبيهة بالماضي
أصدرت منظمة “هيومن رايتس ووتش” تقرير – تاريخه تموز (يوليو) 2019 –
اتهمت فيه السلطات التركية باحتجاز السوريين
وإجبارهم على توقيع وثائق العودة الطوعية وترحّيلهم لسوريا قسراً
وكان رد فعل وزير الداخلية التركي سليمان صويلو بحينها
إنه نفى صحة هي الاتهامات جملة وتفصيلاً.
علي: اخذنا غرفة قعدنا فيها انا وفي معي شباب إثنين
ما النا حدى نهائيا وفي شباب تانيين ما الهم حدى هلق جايين على الطريق.
الصراحة وضعنا جدا سيئ
حتى اجينا يعني.. سبحان الله كنت طالع قدم امتحان.
لما مسكوني ما كان معي مصاري بجيبي .. ولا بعرف شو عم يصير
اجيت لهون لا مصاري ولا شي.. ولا الي حدى اروح لعنده ولا بعرف حدى هون
فحسبي الله ونعم الوكيل على الشي يلي صار فينا..
محمد: وأنا… أنا عم احاول اهدئ واستقر وجرب شوف الشغلات الإيجابية بحياتي بهالمكان.
واخيرا لقينا بيت حلو
صار عندي غرفة خاصة للشغل وبلكون مشمس طول النهار تقريبا
وغندورة ولدت
انضم النا 3 أعضاء جدد بالعيلة، أولاد غندورة: كساندرا وتومي والحلوة
بالنسبة الهن هاد هو البيت
هنن ما بعرفو غيره اصلاً
ويبدو أنه غندورة كمان بلشت تعتبره البيت
ونحن كمان حتى إشعار آخر
الصورة: عمل بعنوان Welcome Refugees. خطــ٣٠ // تنشر وفق الحقوق المفتوحة Copyleft
الموسيقى: Daniel Birch – Music Box and Chill تحت رخصة المشاع الإبداعي
