لازم إستعجل ولازم استفيد من هالفرصة لأنو الكهربا جاية.. ولهيك حطيت قهوتي عالسخانة، لأنو ما في غاز
الدنيا نار.. وأنا عم حضر حالي لروح على شغلي.. أنا المهندسة الموظفة صبا
مولدة جارنا عم تهدر برا، وأنا رح اتجاوز صوت المولدة اللعينة، ورح حط فيروز وإسقي حبقاتي وصباراتي
ورح ابدأ نهاري بفرح.. صباح الخير
صدفة حلوة إنو تكون فايق وعندك كهربا.. بس، انقطعت
نحنا تعودنا على انقطاع الكهربا، أو بالأحرى على عدم وجودها
وفرحتي بالمروحة راحت هلق معها
بس مو مشكلة بلا مروحة، ما هو ليش المروحة أساساً؟
هلق يعني ما عاد فيني إلبس بلا مروحة؟ ما عاد فيني حط مكياجي بلا مروحة؟ إي يرحم جدي لما كان عندو مروحة !!
عادي إي، ويشرشر العرق مني، وتلزق تيابي، ويسيح مكياجي.. شو هالقصة !!
إي وبلاه هالمكياج، يعني هلق صرت خلق وعالم، وبدي إتميكج وإتأنق وإترستق ..
فلهاد السبب السخيف، رح أعمل التسريحة المناسبة.. وإرفع شعري وضبو وإلبس تيابي عالسريع
وأهم شي إلبس بوط الرياضة المريح، لأنو ورايي ركض.. وهرولة.. ومطاحشة عالباص
الباص يلي مالو موعد.. حكايتي ومعاناتي الأزلية كل يوم
وأنا هلق عم استناه.. و مش لحالي، أنا وأفواج من البشر على مد عينك والنظر
وأخيراً وصل الباص بعد انتظار نص ساعة
وأنا محضرة حالي مسبقاً، ومتشبثة بجزداني، ومركزة نظري.. وآخدة لرجليي وضعية الانطلاق
لأنو باللحظة اللي بدو يشحط فيا الباص فرام، سنشن الهجوم أنا وعشرة على الاقل
في نفس اللحظة لنقدر ندحش حالنا جوا هالتنكة
كنت محظوظة جداً اليوم، لأني لاقيت مقعد ولأنو الباص إجا أصلاً
ما هو، مو كل يوم بيجي.. لأنو ما في في مازوت ولأنو الشغلة مو للشبع.. يوم بباص عشرة لاء
ما قلتلكون، لازم إلبس بوط رياضي ومريح..
ولذلك بما إني نلت كل هالحظ من الصبح: كهربا وشوية مروحة وباص ..
فلازم استمتع بالمناظر على طول الطريق على أنغام: زكاتك هون أخي، عندك إذا بتريد، وكزا ..
وبما اني أتيت على ذكر المناظر ، فلازم قلكون شو شايفة أنا هلاء
وشو شامة كمان !!
قدامي في شجر، وفي خضار، وفي بنايات حلوة ومحلات وألوان ..
بس كمان في زبالة، وفي أكوام من الزبالة، وفي أكوام أكوام من الزبالة..
ليتكم تستطيعون أن تشاهدو وأن تشموا !!
يمكن تفكروا إني عم بالغ، وأنا بصراحة عم بتمنى متلكون إني كون عم بالغ..
رفقاتي بالدوام ظراف وكلنا منعيش نفس المعاناة الصباحية كل يوم
بس مع هيك، متل ما حاولت أعمل حديقة صغيرة على شباكي على أمل التفاؤل
عملنا متلها على شباك غرفتنا بالدوام ..
غرفتنا صغيرة وفيا 3 مكاتب لــ 6 مهندسين
بالمناسبة، ضليت سنتين عم طالب لحصلت على مكتب حديد وكرسي قديم
وصرت وتصورت بنظر نفسي عالاقل ..
لأنو مو كل حدا بيتوظف بيطلعلو كرسي.. الكرسي لناس وناس طبعاً
وإذا حصل وانكسر هالكرسي القديم المتهالك
يلي قعد عليه خلينا نقول العشرات ويمكن المئات قبلك، والله بدك تتغرم فيه يا حبيبي
وبسعر السوق الحالي كمان.. هو كرسي أثري مو كيف ما كان ..
الحقيقة إنو أنا بأدي مهامي على أتم وجه، مع إنو ما عنا قرطاسية
وما هي القرطاسية؟! القرطاسية هي قلم وورقة فقط ..
إي صدقوني، ما بيسلمونا قرطاسية.. أنا بشتري قرطاسيتي لحالي، ومن مالي الشخصي ..
وهاد التقرير، لحتى يتم لازم أتواصل مشانو مع عشرين شخص.. بأماكن مختلفة
ليبعتولي تقاريرهم، على الرغم من عدم وجود هاتف أو فاكس أو انترنت أو لابتوب أو كومبيوتر ..
وللحقيقة لحتى كون منصفة هو في فاكس
بس مو دائماً بيشتغل.. ولكن دائماً لا يوجد كهرباء ولا يوجد مولدة ايضاً
وكمان للأمانة، في انترنت.. بس المدير ارتأى انو يقص انتيلاته ويحطو بغرفته.. وممنوع علينا انو نستخدمه
ولذلك، أنا بكون مضطرة إني اتواصل مع باقي المهندسين عن طريق غروب واتس
بس آآآآآآآآه نسيت.. اليوم امتحانات والشبكة اتصالات وإنترنت مقطوعة عن كل البلد..
وهلق رح اشرب قهوة أنا ورفقاتي ونتجاذب أطراف الحديث
ويمكن هي هيي الفقرة الألطف بالدوام، منحكي عن كل شي ..
نحنا كل يوم منقرر ما نحكي عن الهموم وما نحكي عن الكهربا والغاز والبنزين والمازوت
والأسعار .. بس منفشل، ومنحكي ومنزعل ومنرجع منضحك ومنمزح ومنتذمر ..
ومنخطط وما منعمل شي من مخططاتنا، وبالأخير منطلّع عالساعة.. وبتكون المفاجأة إنو الساعة بس عشرة !!
للأسف هون ما حدا ناطر منك إنك تشتغل ..
ولأنو ما حدا بدو ياك تشتغل، فأنت بيكون همك الوحيد كيف تجي عالدوام
وكيف تطلع من الدوام بأقل الخسائر الممكنة
وهمك الأكبر كيف بدو يكفّيك الراتب لنص الشهر
ملاحظة: الراتب هو حوالي 18 دولار وسطيّاً
وهلق، خلص الدوام وأنا صرت جاهزة، متشبثة بجزداني وآخدة وضعية الانطلاق ..
لأنو إذا كنت محظوظة، وما رجعت مشي تحت طقة الشمس.. رح إرجع إطلع بالتنكة الزرقا.. تذكرتوها؟
