مرحبا أنا محمد عم أحكي معكم من اسطنبول بتركيا ورح اخدكم معي مشوار لنحضر حفلة خاصة
خاصة لانو عدد المدعويين قليل كتير لانه نحن حاليا بساعات حظر التجول المسائي باسطنبول
وبالتحديد رح تكون سهرة حلبية خاصة دعانا الها المطرب الحلبي أحمد بدوي
بس الفكرة بما انو نحن بفترة حظر التجول المسائي، فعم امشي وانا خايف تصادفني الشرطة وتخالفني
مع أنه نظرياً يحق للصحفيين يتجولوا بساعات الحظر لاني بمهمة عمل
نظرياً.. عمليا ما بعرف شو ممكن يصير
اوكي هي في شرطة
الواضح انه هنن البوليس يعني مهتم بالسيارات اكتر من المشاة
نعمة انه ما يكون معي سيارة
صوت الحفلة واصل لمدخل البناية وهي شغلة غريبة باسطنبول لان الجيران ممكن تشتكي
بس هي وحدة من ميزات المكان يلي نحن موجودين فيه هلق
نحن ببيت الفن العربي وهو معهد موسيقى يديره الفنان احمد بدوي
وموقعنا بمنطقة مصانع بعيدة عن البيوت السكنية
والعمال يلي واصلهم صوت الموسيقى، غالباً ممنونين لان عم يسمعوا موسيقى شرقية عم تسليهم
كمان عدد الحضور بهي السهر ما بيتجاوز 6 أشخاص وهاد للحفاظ على مسافة تباعد اجتماعي أمنة
بس بالمقابل معظم الموجودين عم يصوروا السهرة بموبايلاتهم وعم يبثوها لايف لحتى يحضرها أكبر عدد ممكن على وسائل التواصل الاجتماعي
اهلين استاذ محمد
على راسي والله
الاستاذ محمد عرواني صحفي
الاستاذ سامر باكير عازف أورغ
عبد الله الأسمر زميلنا مطرب
الأستاذ أبو صطيف حلاق
الأستاذ أبو عبدو
الأستاذ أبو محمد زكو، كل عام وانتم بخير جميعاً
انك تعمل سهرة وتغني وتجمع اصدقائك بوقت الحظر
هي حالة مرتبطة بالحلبية لانهم بيحبو يسهروا أو هي حالة مرتبطة بالفنان
مرتبطة بالفنان ومرتبطة بالحلبية بشكل عام
شو السر؟
ما بيحسنوا ما يسهروا
ما بيحسنوا
يمكن انت بتعرف عن حفلات حلب أو اعراس حلب
الحفلة عنا بتخلص الساعة خمسة الصبح
شعب يحب السهر يحب البسط
يعني المطرب بيطلع من الحفلة صوته تعبان خالص
ليش لأننا شعب يحب السهر
وطبعا لولا ظروف الحظر كنت شفت ناس أكتر
رحلة تعلم الموسيقى أو المقامات أو طبقات الصوت بالنسبة لأي موسيقي بالعالم
بتبدأ بالمدرسة، بالمعهد أو بالكلية الموسيقية.
بس بالنسبة للمطرب الحلبي التعليم يبدأ من الطفولة وين؟
بالمسجد بالجوامع أو الزوايا الحلبية
الشيخ بكون خبير بالمقامات وعادة يكون أول معلم للمطرب الحلبي
بالزوايا عنا وأهل الأذكار بتلاقي الشيخ بيعرف نغم
الشيخ بيعرف نغم، مو بس المنشد يلي ينشد في الأذكار بيعرف نغم
يعني اليوم لما تبلش حلقة الذكر اغلب المشايخ كان هنن يفتتحوها
مثلا.. بلشت حضرة الذكر.. الشيخ يبدأ بالقول
فاعلم أنه لا اله الا الله
ببلشوا الذكيرة كلهم مثلاً
لا اله إلا الله
فـ بتلاقي هاد الولد.. انا لما كنت ولد أو الأستاذ عبد الله
لما نروح على الزوايا ونشوف الشي هاد كنا نتعلمه، نطلّع الناس كلها بتعرف، فأي شي نشاز رح يبين، رح يكون منبوذ يعني
الناس كلها بتعرف، أكثرهم بيميز المقامات والأداء المتقن
وتقريباً معظمهم بغني
وليش لاء ما هنن ابناء بيئة كتير غنية صوتياً
فــ لتكون مطرب محترف وتقدر وتثبت نفسك بين هــ السميعة مانها شغلة سهلة أبداً
الشعب هو بعلم في عندك سميعة معروفين مين هنن ما بيقبلوا أي فنان
يعني الفنان يلي بغني وصوته مو حلو وما بادي صح والناس ما رح تتقبله
فهاد مضطر يشتغل على حاله ويتعلم ويجتهد، لأنه عرفان حاله انه ما رح ينجح في حلب
في شي عنا بالعرس الحلبي اليوم يلي بيسبق يوم العرس بقولوا له تعليلة واليوم يلي بعد العرس بقولوا له الصباحية
هي التعليلة والصباحية ما بجيبو عليها مطرب
اهل العرس اهل العريس كذا بيبركوا هنن بغنوا
هاد بدق دربكة وهاد بدق عود بتلاقيهم كلهم عم يغنوا كلهم عمينتقل من غنية لغنية ومن قد لقد ليلة غير شكل بتلاقيها
لا جايبين مطرب ولا جايبين شي
هاد الشي متأصل فينا بصراحة
وكأن كل الحلبية موسيقيين! كلهم
هنن مو موسيقيين بس بتحسهم موسيقيين
ارجع للقاء محمد عبد الوهاب بتعرف مين هنن جمهور حلب
لما اجا وطلع على حفلة وغنا، فيها 4 اشخاص أو 5 اشخاص بس
فقال للمتعهد شو جايبني على هيك حفلة شو؟ فقال له هدول النخبة
واترفعت الستارة.. وإذ بــ 4 آلاف نفر قاعدين وفوقهم كمان يمكن ألف نفر واقفين
وبعدين جبت الرجل المتعهد وقلت له تعال قل لي ايه الحكاية ايه السر يعني ليه؟!
قلي بقا انت مش عارف حلب.. حلب دي البلد الذواقة
لما بيجي مغني حديث ما بتجيش البلد تسمعه
بتبعت أولا السميعة من الدرجة الأولى في البلد يروحوا يسمعوا المغني
تاني يوم اذا زكوه يروحوا يسمعوه
ولو قال عن المغني ده ميستهلش ما يروحوش
يعني لا سمح الله مهددة الحفلة التانية بدون ولا نفر
اه الحمد لله طلعت براءة
هاد كان صوت الموسيقار محمد عبد الوهاب من أرشيف اذاعة دمشق عن زيارته الاولى لحلب سنة 1927
طيب اليوم بعد تهجير مئات ألوف الحلبيين وانفصال المطرب الحلبي عن السميعة الحلبية
كيف صار وضع الفنان
الوضع صار اسوء، وما عم احكي بس على مستوى تركيا.. بعد هالنزوح يلي صار خلال 10 هالـ سنين
للاسف عندك هلق جيل كامل طلع
وهاد الجيل يعني اليوم في ناس عمرها يلي طلع عمره 7 او 8 سنين هلق صار عمره 17 أو 18 أو 20 سنة
يعني صار اسمه شب واذا بتحكي معه عن صباح فخري أو اسم محمد خيري أو عن الناس هدول ما بيعرفهم
تغيرت الثقافة الفنية
يعني الفنان الحلبي قدران يعيش من الفن بتركيا
والله مو كلهم لحتى نكون صريحين
مو قدران يعيش
وعلى الفكرة الفنان عم يتأثر بأي عارض عم يصير سواء صحي متل الازمة يلي عايشينها، سواء سياسي يعني اليوم هي أول مصلحة بتوقف واخر مصلحة بتشتغل
لان للاسف بتعرف نحن عنا الفن يعتبر من الكماليات
هي الاسباب وغيرها اجبرت كتير من الفنانين الحلبيين بتركيا انهم يشتغلوا بمهن بعيدة عن الفن
واحد من ضيوف سهرة اليوم الفنان عبدالله الاسمر، رح يخبرنا بطريقته كيف بعيش الفنان الحلبي بتركيا
والله اذا عم تمشي الأمور على بركة الله ما بعرف كيف بدي قلك
والله عايش عالبركة.. هي اغنية الأستاذ أحمد.. طفران وعفت التنكة.. مافي بجيبي ولا وتكة ولا اجرة سرفيس
هي اغنية سواها الاستاذ أحمد من الوضع الاقتصادي.. يعني هاد الوضع.. الحمد لله على كل الأحول مافينا نقول غير الحمد
شو مشان حلب هلق
مشان حلب.. اه على حلب.. مافينا نقول غير الله يهدي الاحوال وتخلص هالقصة و نرجع على بلدنا متل ما كنا ونرجع نغني
يعني في مشروع رجعة؟
ان شاء الله.. بنقول ان شاء الله
سمعك موال حلب؟
حلب مدينة لديها علاقة استثنائية مع الغناء الشرقي لدرجة القول أحياناً إن كل الحلبيين مطربين.. إلا أن الحرب في سوريا فصلت المطربين الحلبيين عن مدينتهم، واضطرتهم في أحيان كثيرة للعمل في مهن بعيدة عن الفن.. استقر الكثيرين منهم في تركيا، وهي الأقرب إلى المدينة، من ضمن أكثر من ثلاثة ملايين لاجئ سوري هُجروا إلى هنا.
ثم جاء حظر التجوال المرتبط بالكورونا ليُضيّق الخناق أكثر على العاملين في مجال الموسيقى، لكنه في النهاية لم يمنع الحلبيين في العاصمة اسطنبول من إحياء السهرات الغنائية.
